*** नैनाजीका मुक्तकहरु – २ ***

व्यथा बोकेर कोशीको किनारा दुखेझैं लाग्छ,

गृहयुद्दको भुमरिमा सर्वहारा दुखेझैं लाग्छ

मनभरी अनगिन्ती बिरही तरंगहरु बोकेर,

अनकन्टारबाट देश नियाल्दै रारा दुखेझैं लाग्छ ।

तारा झार्छु भन्नेहरुले ब्ल्याक् होल झारेर बसे,

जनविश्वासको उर्वर सतहभरी खाल्डो पारेर बसे

जनचाहना र भावना बुझ्ने नेता को छ र यहाँ ?

बनाउँछु भन्दै फेरी संविधानको मिती सारेर बसे ।

निस्पन्दनले स्पन्दनसित केही खोलेझैँ लाग्छ,

यो मनले धड्कनसित केही बोलेझैँ लाग्छ

लोकतन्त्र भनेको त जनताको प्राण होइन र ?

तर कठीन जनजीवनले झन् पोलेझैं लाग्छ ।

रचनाकार

Naina Nirjharaa

Dhading Nepal