::: फुर्सद भएमा पल्टाउनु मेरा जीवनका पानाहरु :: अनिता भण्डारी पौडेल

फुर्सद भएमा पल्टाउनु मेरा जीवनका पानाहरु
तिमीलाई सुनाउन नसकेका मनका तानाहरु

गुनगुनाए होला कयौ पटक प्रेमको छहारीमा
दुनियाँले सुन्न नसकेका म भित्रका गानाहरु

हातेमालो साथीसंगी समयसंगै फरक फरक
एकान्तमा खोजे तिमीलाई बनाई बहानाहरु


कत्ति शब्द मडारिए होलान म संगै डायरीमा
न त उजाडियो कसैको घर न कसैका छानाहरू

केवल सजाएँ मेरो मुटुभित्र तिमीसंगका यादहरु
रित्तिएन कसैको भकारी न त खोसियो मानाहरु

रचनाकार

अनिता भण्डारी (पौडेल )

नँया बानेश्वर, काठमाडौँ